भेनेजुएलाका राष्ट्रपति मदुरो अमेरिकी सेनाको नियन्त्रणमा रहेको तस्बिर ट्रम्पद्वारा सार्वजनिक

अमेरिकीले भेनेजुएलामा आक्रमण गरी त्यहाँका राष्ट्रपति निकोलस मदुरोलाई नियन्त्रणमा लिएको छ । अमेरिकी राष्ट्रपति डोनाल्ड ट्रम्पले ‘आँखामा पट्टी बाँधिएको’ मदुरोको तस्बिर आफ्नै सामाजिक सञ्जाल ’ट्रुथ सोसियल’ मा सार्वजनिक गर्नुभएको हो ।

सार्वजनिक तस्बिरमा ६३ वर्षीय मदुरोले ट्रर्याक सुट लगाएको र एउटा प्लास्टिकको पानीको बोतल समातिरहेको अवस्थामा देखिनुभएको छ । ट्रम्पले भेनेजुएलामा सत्ताको सुरक्षित हस्तान्तरण नभएसम्म अमेरिकाले नै त्यहाँको शासन व्यवस्था सञ्चालन गर्ने बताउनुभएको छ । साथै, उहाँले भेनेजुएलाको विशाल कच्चा तेल भण्डार उत्खननका लागि अमेरिकी तेल कम्पनीहरूलाई तत्काल अनुमति दिने घोषणासमेत गर्नुभएको छ ।

न्यूयोर्क टाइम्ससँग कुरा गर्दै ट्रम्पले यसलाई एउटा ‘शानदार अपरेसन’ को संज्ञा दिनुभएको छ । भेनेजुएला सरकारले आक्रमणलाई वासिङ्टनको ‘अत्यन्त गम्भीर सैन्य आक्रमण’ भन्दै देशमा संकटकालको घोषणा गरेको छ । भेनेजुएलामा अमेरिकी आक्रमण र मदुरो पक्राउ परेपछि विश्व समुदाय भने विभाजित देखिएको छ । रुस र इरानले यो सैन्य कारबाहीको कडा शब्दमा निन्दा गरेका छन् ।

अमेरिकाको सहयोगी देश फ्रान्स र युरोपेली संघ (ईयू) ले समेत यस कदमप्रति गम्भीर चिन्ता र संशय व्यक्त गरेका छन् । बेलायतका प्रधानमन्त्री किअर स्टार्मरले भेनेजुएलामा भएका अमेरिकी कारबाहीमा बेलायत ‘कुनै पनि हिसाबले संलग्न नभएको’ बताउनुभएको बीबीसीले जनाएको छ ।

चीनले भेनेजुएलामा अमेरिकाले गरेको आक्रमण र त्यसका राष्ट्रपतिमाथि गरिएको कारबाहीको कडा शब्दमा निन्दा गरेको छ । यस्तै स्पेनका प्रधानमन्त्री पेड्रो सान्चेजले ‘तनाव वृद्धितर्फ जिम्मेवार’ बन्नका लागि आह्वान गर्नुभएको छ । उज्यालो