१४ वर्षमा एकपटक मध्यरातमा यसपटक फुल्दैछ यो फूल, हेर्नलाई पर्यटकको भीड

एजेन्सी, २२ भाद्र । हिमालको काखमा १४ वर्षमा एकपटक फुल्छ ब्रह्मकमल फूल । तीन हजार मिटरको उचाईमा पाइने यो फूल रातको समयमा मात्र फुल्छ । तर बिहान भएपछि त्यो फूल आफै बन्द हुन्छ ।यही फुललाई हेर्न अहिले विश्वभरका मानिसहरु यी फूल पाइने स्थलहरुमा जम्मा हुँदैछन् । उक्त फूल चीन, भारत जस्ता विभिन्न मुलुकहरुको विभिन्न स्थानहरुमा पाइन्छन् । ठाउँ अनुसार यो फूल विभिन्न नामले चिनिन्छ ।

ब्रह्मकमल फूल चिसो क्षेत्रमा पाइन्छ । यसलाई भारतको हिमाली क्षेत्र, उत्तराखण्ड राज्य, उत्तरी बर्मा र चीनको उत्तरी, दक्षिण पश्चिम क्षेत्रमा पाइन्छ । यी फूलहरु भारतको उत्तराखण्ड राज्यको तीन धाममा पनि पाइन्छ । यसको आफ्नै धार्मिक र प्राचीन मान्यता छ । यसलाई महादेवको प्रिय फूल मानिन्छ । यसको नाम भगवान ब्रह्माको नाममा राखिन्छ ।

त्यस्तै यो दिव्य, सुन्दर र सुगन्धित फूललाई चीनमा ‘तानहुआयिझियान’ भनिन्छ । वनस्पति शास्त्रमा यसको ३१ वटा प्रजाती हुने बताइएको छ । यसको वैज्ञानिक नाम ‘साउसुरिया ओबुवालाटा’ हो । यो फूल जुलाई र सेप्टेम्बरका बीचमा मध्य राति मात्र फुल्छ । ब्रह्मकमल फुललाई सुकाएर क्यान्सर उपचारका लागि प्रयोग गरिन्छ । यसको औषधी र सुन्दर गुणका लागि यसलाई सुरक्षित प्रजातिको रुपमा राखिएको छ ।