एसिया कप छनोट: आज नेपालले थाइल्यान्डसँग खेल्दै

काठमाडौँ, २१ असोज । दुई खेलमा लगातार जित निकालेको नेपालले मलेसियामा जारी आईसिसी विश्व टी–ट्वान्टी क्रिकेट एसिया छनोट समूह बी अन्तर्गत तेस्रो खेलमा आज थाइल्याण्डसंग प्रतिस्पर्धा गर्दैछ । नेपाल तेस्रो जितको खोजीमा रहेको छ ।

शनिबार आयोजक मलेसियालाई नेपालले ८ विकेटले हराएको थियो । त्यसअघि पहिलो खेलमा नेपालले म्यानमारलाई पनि ८ विकेटले हराएको थियो । नेपाली समय अनुसार आज अपरान्ह १२ः१५ मा क्वालालम्पुरस्थित वायुमास ओभलमा नेपाल र थाइल्याण्डबीचको खेल सुरु हुनेछ ।

थाइल्याण्ड नेपालको लागि नौलो प्रतिद्वन्द्वी समेत हो । महिला र उमेर समूहमा नेपालले थाइल्याण्डसंग प्रतिस्पर्धा गरिसकेको छ । तर, पुरुष टोलीले भने दोस्रो पटक खेल्न लागेका हुन् । यसअघि सन् १९९८ को एसीसी ट्रफीमा नेपाल र थाइल्याण्डबीचको खेल तय भएको थियो । तर, वर्षाको कारण उक्त खेल टस समेत नभई स्थगित भएको थियो ।