कब्रिस्तानमा एकै परिवारका ४ चिहानबाट मात्र दिनहुँ गायब हुन्थे चढाएका ताजा फूल

एजेन्सी। इङल्याण्डको किंग्सटनमा एक परिवारका ४ चिहानबाट सधैं चढाइएका ताजा फूल गायब हुन्थे । मृतकको परिवार यो कुराले निकै हैरान भएका थिए । किनकि कब्रिस्तानका बाँकी चिहानबाट भने यस्तो कहिल्यै हुँदैनथ्यो । ७ महिनासम्म यो रहस्यमय सिलसिला चलिरह्यो । अन्ततः परिवारले नजिकैको एक रुखमा स्पाइ क्यामेरा लुकाएर राखे । त्यसमा जुन दृश्य कैद भयो त्यो निकै आश्चर्यजनक थियो ।

रसल परिवारका दुई छोरीको असामयिक मृत्युपछि उनीहरु दुवैको शवलाई नजिकै गाडिएको थियो । यी दुई छोरीमध्ये एउटी छोरीको मृत्यु १२ र अर्कीको १८ वर्षको उमेरमा भएको थियो । दुवैको मुटुसम्बन्धी रोगका कारण मृत्यु भएको थियो । दुवै छोरीको मृत्युपछि सन्तानविहीन भएका रसल दम्पतीको पनि गतवर्ष मृत्यु भयो । त्यसपछि उनीहरुलाई पनि छोरीहरुको चिहानको छेउमै गाडियो । रसल परिवारका बाँकी सदस्यले यहाँ यी ४ जनाको चिहानमा सधैं ताजा फूल चढाउँथे तर केही घण्टामै ती फूल गायब हुन्थे ।

रसल परिवारले क्यामेरा लगाएपछि त्यहाँको घटना रेकर्ड भयो । भिडियोमा एक व्यक्ति देखिए । ती व्यक्ति सधैं एउटा निश्चित समयमा त्यहाँ आउँथे र ती ४ चिहानमा चढाइएका फूल र बुके लिएर जान्थे । रसल परिवारका एक अर्का सदस्य एलनका अनुसार यो देखेर उनीहरु निकै चकित परे । ती व्यक्ति चिहानका सबै फूल लिएर जान्थे यो मानवतालाई लज्जित बनाउने काम थियो । रसल परिवारले यसको उजुरी प्रहरीमा गरेका छन् । प्रहरीले फुटेजका आधारमा ती व्यक्तिको खोजी गरिरहेको छ । अहिलेसम्म भने उनी भेटिएका छैनन् ।