दम्पतीको चोरी भएको कार प्रहरीले खोज्यो, तर चौकीबाटै फेरि चोरले पारे गायब

एजेन्सी । इंग्ल्याण्डमा एक कार केही घण्टा भित्रै दुई पटक चोरी भएको छ । घटता लेस्टरको लुटरवर्थको हो । चोर एक दम्पतीको घरमा घुस्छन् । उनीहरुलाई पेस्तुल देखाएर कारको साँचो माग्छन् । र ग्यारेजमा गएर कार लूटेर भाग्छन् ।

दम्पतीले यो घटनाको प्रहरीमा रिपोर्ट गर्छन् । प्रहरीले केही घण्टामै कार बरामद पनि गरेको थियो । र कार भेटिएको जानकारी प्रहरीले सो दम्पतीलाई दियो ।

तर, केही समयपछि चोरहरुले प्रहरी चौकीमै आएर सो कार फेरि चोरेर भागे । त्यसपछि प्रहरीले दम्पतीलाई फोन गरेर माफि माग्यो ।

ओडी कम्पनीको यो कार ४० हजार पाउण्ड करिब ५५ लाख रुपैयाँ नेपाली बराबरको हो ।

प्रहरीले यसलाई एक राजमार्गबाट बरामद गरेको थियो ।

कार दोस्रो पटक चोरी भएको सूचना दिन प्रहरी चौकीबाट दम्पतीलाई फोन गर्दा उनीहरुले प्रश्न गरे कतै मजाक त होइन । तर, प्रहरी कर्मचारीले भने, ‘होइन कार साँच्चै दोस्रो पटक चोरी भएको छ ।’ उसले माफी पनि माग्यो ।

प्रहरीका अनुसार चोरहरुले कारलाई दोस्रो पटक चोरी गर्ने षडयन्त्र पहिला नै बनाएका थिए । खासमा कारमा पेट्रोल सकिएको थियो । त्यसैले चोरले कार राजमार्गमा छोडेका थिए ।

प्रहरीका अनुसार चोरलाई थाहा थियो प्रहरीले कार खोज्ने छ र पेट्रोल भरेर प्रहरी चौकी लिने छ । त्यसपछि फेरि चोरी गर्ने योजना चोरहरुले बनाएका थिए । प्रहरी फेरि यो कारको खोजीमा लागेको छ ।