ब्राजिलः बाँध भत्किँदा ३४ को मृत्यु, तीन सय बढी बेपत्ता

ब्राजिलको दक्षिण पूर्वस्थित मेनस जेराइस राज्यको ब्रूमाडिनो शहर नजिकै भएको एउटा बाँध भत्किँदा अहिलेसम्म ३४ जनाको मृत्यु भएको छ भने तीन सय बढी हराइरहेका छन् । राज्यका गभर्नर रामू जेमाले यसबारे पुष्टि गरेका छन् । जेमाले भग्नावशेषबाट जीवित मानिसको उद्दार गर्ने सम्भावना निकै कम भएको जानकारी दिएका छन् ।

आपतकालीन राहत टोलीले हेलिकोप्टरको मद्दतले माटोमा फसेका थुप्रैको उद्दार गरेका छन् ।अधिकारीका अनुसार बाँध भत्किएका बेला थुप्रै मजदुर वेले कम्पनीको क्यान्टिनमा खाजा खाइरहेका थिए । कम्पनीका अध्यक्षका अनुसार क्यान्टिन पुरै पुरिएको छ ।

उनका अनुसार गत वर्षको सेप्टेम्बरमा बाँध परीक्षण गरिएको थियो र त्यतिबेला यसलाई सही स्थितीमा भएको बताइएको थियो । ब्रूमाडिनो बाँध भत्किँदा मेनस जेराइस राज्यका थुप्रै इलाका प्रभावित भएका छन् भने थुप्रै गाउँपनि यसको चपेटामा परेका छन् ।