जानकी मन्दिर पनि छिट्टै विश्व सम्पदा सूचीमा
धनुषा – जनकपुरको जानकी मन्दिरलाई विश्व सम्पदा सूचीमा राखिने भएको छ । पुरातत्व विभागका टोलीसँगै युनेस्कोबाट आउनुभएका क्रिष्टन मनहर्टले जनकपुरधाम उपमहानगरपालिकाका प्रमुख लालकिशोर साहसँग बिहीबार यस विषयमा छलफल गर्नुभएको थियो ।
विश्व सम्पदा सूचीमा राख्न अधिकांश प्रक्रिया पूरा भए पनि अझै केही गर्नुपर्ने बाँकी रहेको मनहर्टले जानकारी दिनुभएको उपमहानगरप्रमुख साहले बताउनुभयो ।
मनहर्टले विश्व सम्पदा सूचीमा सूचीकृत गराउन पूर्वाधारसम्बन्धी पुस्तक आफूलाई दिनुभएको र त्यहीबमोजिम बाँकी प्रक्रिया पूरा आग्रह गर्नुभएको उहाँले उल्लेख गर्नुभयो ।
उपमहानगरप्रमुख साह तथा उपप्रमुख रिताकुमारी मिश्रले मनहर्टको सम्मान गर्नुभएको थियो । अहिलेसम्म नेपालका सांस्कृतिक र प्राकृतिक सम्पदा गरी १० वटा क्षेत्र विश्व सम्पदा सूचीमा सूचीकृत छन् ।
विश्व सम्पदा सूचीमा परेको नेपाली सम्पदा
पशुपतिनाथ मन्दिर
स्वम्भूनाथ स्तुपा
बौद्धनाथ स्तुपा
काठमाण्डौ दरबार स्क्वायर
पाटन दरबार स्क्वायर
भक्तपुर दरबार स्क्वायर
चाँगुनारायण मन्दिर
लुम्बिनी
चितवन राष्ट्रिय निकुञ्ज
सगरमाथा राष्ट्रिय निकुञ्ज