तारा एयरले भित्र्यायो नयाँ ट्विन अटर विमान

काठमाडौं, ५ साउन । तारा एअरले शुक्रबार साँझ आफ्नो नयाँ ट्विन अटर वायुयान भित्र्याएको छ । उक्त विमान सेसेयल्स, माल्दिभ्स, भारत हुँदै काठमाडौं अवतरण गराइएको हो ।नयाँ विमानको चालकदलमा वरिष्ठ क्याप्टेन प्रभाकर प्रसाद घिमिरे, वरिष्ठ क्याप्टेन पवन सिंह नगरकोटी तथा प्राविधिक सहयोगार्थ ईन्जिनियर जगत लामा रहेका छन् । चालकदलका साथमा नेपाल नागरिक उड्डयन प्राधिकरणका तर्फबाट एअरवर्दिनेस् ईनिस्पेक्टर ईन्जिनियर विधान श्रेष्ठ रहेका तारा एयरले जनाएको छ ।

नयाँ विमान भाईकिङ्ग ४०० श्रृङ्खलाको हो । भाईकिङ्ग ४०० श्रृङ्खलाका यी ट्विन अटर वायुयानहरु सजिलै नेपालका चुनौतीपूर्ण विमानस्थलहरु लुक्ला, डोल्पा, तथा रारालगायतका स्थानमा उडान भर्न सक्षम रहने तारा एयरले जनाएको छ । विमानको सफलतापूर्वक जाँच र परीक्षण उडान गरेपछि नेपाल नागरिक उड्डयन प्राधिकरणद्वारा 9N-ALO दर्ता नम्बर प्रदान गरेको छ । नयाँ वायुयान थपसँगै नेपालको सन् २०२० सम्ममा २० लाख पर्यटक भित्र्याउने महत्वाकांक्षमा तारा एअरले समेत महत्वपूर्ण योगदान पुर्‍याउने तारा एयरले दावी गरेको छ ।