दशैँका लागि नयाँ नोट सर्वसाधारणले असोज २१ गतेदेखि पाउने

काठमाडौँ, नेपाल राष्ट्र बैंकले यस वर्षको दशैंको लागि असोज २१ गतेदेखि सर्वसाधारणको लागि नोट उपलब्ध गराउने भएको छ । राष्ट्र बै‌कले यस वर्ष सर्वसाधारणको लागि गतवर्षभन्दा १ अर्ब बढी रुपैयाँ निष्काशन गर्न लागेको हो । गत वर्ष राष्ट्र बै‌कले १२ अर्ब निष्काशन गरेको थियो भने यस वर्ष १३ अर्ब निष्काशन गर्ने जनाएको छ ।

यस वर्ष ५, १०, २०, ५० र १०० दरका नोट १३ अर्ब रुपैयाँभन्दा बढी सटही प्रयोजनका लागि निष्काशन गरेको नेपाल राष्ट्र बैंक मुद्रा व्यवस्थापन विभागका प्रमुख समेत रहेका कार्यकारी निर्देशक लक्ष्मी प्रपन्न निरौलाले जानकारी दिए ।

सर्वसाधारणले नेपाल राष्ट्र बैंक थापाथली, राष्ट्रिय बाणिज्य बैंक, कृषि विकास बैंक र नेपाल बैंकका काठमाडौँ विभिन्न ठाउँका झण्डै १६ शाखामार्फत् नयाँ नोट सटही गर्न सक्नेछन् । सरकारी नोटकोष भएको बैंकबाट नयाँ नोट वित्तरण गरिने राष्ट्र बैंकले जनाएको छ ।बैंकले असोज १२ गते नै नयाँ नोट पाए पनि सर्वसाधारणले भने असोज २१ सम्म कुर्नु पर्नेछ । उपत्यका बाहिर भने प्रतिव्यक्ति २७ हजार रुपैयाँसम्म नयाँ नोट वितरण गर्ने राष्ट्र बैंकको तयारी छ ।