आफ्ना ड्राइभर र सहयोगीलाई घर किन्न आलियाले दिइन् १ करोड

काठमाडौं । आलिया भट्टको व्यक्तिगत र व्यवसायिक जीवन दुवै एकदमै शानदार छ । एकपछि अर्को हिट फिल्म दिइरहेकी आलिया बलिउडकी चर्चित नायिकामध्येकी एक हुन् । आलिया पछिल्लो केहीसमयदेखि रणबीर कपूरसँगको सम्बन्धको कारण पनि चर्चामा छिन् । दुबैको परिवार पनि उनीहरुको सम्बन्धलाई लिएर एकदमै सकारात्मक नै देखिएका छन् । तर अहिले भने आलिया एउटा अर्कै कुराले चर्चामा आएकी छन् ।

आलिया भट्टको जिन्दगीमा उनको पिता महेश भट्ट, मेन्टर करण जोहर र ब्वाइफ्रेन्ड रणबीर कपूर सबैभन्दा महत्व राख्छन् । तर यी तीनजनाको अलावा अर्को एक जना पनि छन्, जसको लागि आलिया जे पनि गर्न सक्छिन् । हालै आलियाले त्यस कुराको साबित गरेकी छिन् । यी व्यक्ति अरु कोहि नभएर आलिायाका ड्राइभर सुनील र उनका सहयोगी अमोल हुन् ।

जब आलियाले आफ्नो करियर २०१२ मा शुरु गरिन्, त्यतिबेला देखिनै उनीहरु आलियाको साथमा छन् । आलियाले यी दुई व्यक्तिलाई परिवारको सदस्य नै मान्छिन् । त्यसकारण उनले घर किन्नको लागि सुनील र अमोललाई ५०–५० लाख भारतीय रुपैयाँ दिइन् । भारतीय मिडियाका अनुसार सुनील र अमोलले मुम्बईको जुहू र खार क्षेत्रमा १ बिएचकेको घर बुक गरिसकेका छन् ।