नेपाल प्रहरीकै पेजमा राति यस्ता अश्लिल तस्विर पोष्ट भएपछि

काठमाडौ । अहिले नेपालमा सामाजिक सञ्जाल एकदमै असहज बन्दै गएको छ । एक नेतासँग अर्को नेताको फोटो सम्पादन गरेर होस वा अन्य कुनै कारणले होस नेपालमा सामाजिक सञ्जालको गलत प्रयोग भइरहेको छ ।

यस्तै, जिल्ला प्रहरी कार्यालय गोरखाको फेसबुक पेजमा हिजो बेलुका साढे ८ बजे प्रोफाइल र कभर तस्विर अचानक परिवर्तन भएको देखियो ।

२०१६ पछि सोमबार पहिलो पटक एक्टिभ देखिएको यो फेसबुक पेजमा एकाएक अश्लिल तस्विर पोस्ट भएपछि गोरखा प्रहरी पनि हैरान भएको छ । प्रहरीसँग यो फेसबुक पेजको पासवर्ड नरहेको जिल्ला प्रहरी कार्यालय गोरखाका असई महेन्द्र चौधरीले जानकारी दिनुभयो ।

उहाँले सोमबार साँझ यो घटना भएको भन्दै मंगलबार यो विषयमा छानविन हुने बताउनुभयो । यो फेसबुक पेज धेरै पहिला बनेको हुँदा त्यसपछि सरुवा भएर धेरै प्रहरी अधिकारी गइसकेकाले यसको पासवर्ड जिप्रकासँग नरहेको उहाँको दावी रहेको छ । जिल्ला प्रहरी कार्यालयको नाममा रहेको फेसबुक पेज अरुले चलाएको हुनसक्ने जिल्ला प्रहरी प्रमुख एसपी भोला रावलले जानकारी दिनुभयो ।

उहाँले भन्नुभयो, ‘पेजमा यस्तो देखिएपछि तनाब हुन थालेको छ । रातभरि सुत्न पनि पाएको छैन’ उहाँले अगाडी थप्दै भन्नुभयो, ‘विभिन्न ठाउँबाट फोन आइरहेका छन् ।

हामी निरन्तर त्यसलाई हटाउन र कसले यस्तो गर्यो भनेर पत्ता लगाउन लागिपरेका छौं ।’ सिआईबीको समेत प्रयोग गरिएको छ र अहिले यो पेज फेसबुकमा देखिएको छैन ।