धनुषामा साढे दुई वर्षीय बालककाे घाँटी रेटेर हत्या

धनुषा – धनुषामा साढे दुई वर्षको बालकको घाँटी रेटी हत्या भएको छ । मिथिला नगरपालिका–६ ढल्केबरका शम्भु साहका साढे दुई वर्षीय छोरा आर्यन साहको घाँटी रेटी हत्या भएको हो ।सोमबारदेखि हराइरहेका बालकको आफ्नै घर पछाडीको आँपको बगैँचामा मंगलबार बिहान घाँटी रेटेर हत्या भएको अवस्थामा शव फेला परेको हो । बालक सोमबार दिउँसो घरबाट बेपत्ता भएपछि प्रहरीलाई जानकारी गराइएको थियो । प्रहरीसहित स्थानीयले खोजी गरिरहेका थिए ।

वैदेशिक रोजगारीमा गएका शम्भुको दुई छोरी र एक मात्र छोरा थिए । इलाका प्रहरी कार्यालय ढल्केबरका प्रहरी निरीक्षक सरोज राईले बालकको हत्या भएको बताउनुभयो । उहाँले बालकको अपहरणपछि हत्या भएको हुनसक्ने अनुमान गरिएको जानकारी दिनुभयो । ‘घटनाबारे अनुसन्धान भैरहेको छ । अनुसन्धानपछि मात्र घटनाबारे जानकारी दिन सकिन्छ ।’ उहाँले भन्नुभयो ।