विद्यार्थी कुट्ने नयाँबानेश्वरको स्कुलकी शिक्षिकाको जागिर चट् !

काठमाडौं। राजधानीको एक स्कुलकी शिक्षिकालाई विद्यालयले जागिरबाट निकालिदिएको छ । ती शिक्षिकाले विद्यार्थी कुटेको थाहा पाएपछि अभिभावकले उनीमाथि कारवाहीको माग गरेका थिए । विद्यालयले सोमबार शिक्षिकालाई जागिरबाट निकालिदिएको हो ।

राजधानीको नयाँबानेश्वर शान्तिनगरस्थित बेबिलोन नेशनल स्कुलकी शिक्षिका एलिशा राईले करिब १० दिनअघि ६ कक्षाका विद्यार्थी नवोम श्रेष्ठलाई कुटपिट गरेकी थिइन् । तर, शिक्षिकाले डर देखाएकोले उनले यसबारे कसैलाई भनेका थिएनन् । पछि अभिभावकले उनको शरीरमा नीलडाम देखेपछि यसबारे सोध्दा शिक्षिकाले कुटपिट गरेको खुलेको थियो । त्यसपछि अभिभावकले यसबारे सकुल प्रशासनलाई जानकारी गराएका थिए ।

अभिभावकले स्कुलमा यसबारे गत बिहीबार जानकारी गराएको प्रिन्सिपल राजु राईले बताए । अभिभावकले जानकारी गराएपछि शिक्षिका एलिशा राइसँग यसबारे सोधपुछ गर्दा उनले कुटपिट गरेको स्वीकार गरेकी थिइन् । ‘उहाँले कुटपिट गरेको पुष्टि भएपछि हामीले उहाँमाथि कारवाही गरेका हौं’ प्रिन्सिपल राजु राईले डिसीनेपालसँग भने ‘बालबालिकालाई आफ्नै अभिभावकले त कुट्न पाइँदैन भने हामीले कसरी पाउनू ।’ प्रिन्सिपल राइले शिक्षिकाले स्कुलकै इज्जत जाने काम गरेको बताए ।