पैसा लिएर अपराधी जोगाएको आरोपमा प्रहरी निरीक्षक पक्राउ

काठमाडौं, २६ जेठ । ज्यान मुद्दामा संलग्न चालक जोगाएको आरोपमा नेपाल प्रहरीका एक अधिकृत पक्राउ परेका छन् ।इलाका प्रहरी कार्यालय गैडाकोटका प्रमुख लोकबहादुर जिसीलाई अख्तियार दुरुपयोग आयोगले पक्राउ गरेको हो । आयोगको केन्द्रीय कार्यालयबाट खटिएको विशेष टोलीले मंगलबार प्रहरी निरीक्षक जिसीलाई नवलपरासीबाट पक्राउ गरेको हो। नक्कली चालक खडा गरेर घटनाको सत्यतथ्य लुकाउन खोजेको आरोपमा उनीमाथि अनुसन्धान भइरहेको आयोगले जनाएको छ ।

गत वैशाख ११ गते राती बोधराज पाण्डेले पूर्वपश्चिम राजमार्गको गैंडाकोट खण्डमा चलाएको कारले विपरीत दिशाबाट आएको मोटरसाइकललाई ठक्कर दिँदा मोटरसाइकल पछाडि बसेकी युवतीको मृत्यु भएको थियो भने मोटरसाइकल चालक घाइते भएका थिए।तर सबारी ज्यान मुद्दामा नक्कली चालक खडा गरेर प्रमाण नष्ट गरेको अभियोग जिसीमाथि लगाइएको छ । कारचालक पाण्डेले प्रहरीसँग मिलेर किसुन महतोललाई नक्कली चालकका रुपमा खडा गरेका थिए । इन्स्पेक्टर जिसीले पाण्डेबाट १० लाख लिएर नक्कली चालक खडा गरेको उजुरी परेको थियो । सोही उजुरीमाथी छानबिन गर्दा जिसीको संलग्नता खुलेपछि उनलाई पक्राउ गरिएको हो ।