इतिहासकै सबैभन्दा महंगो मूल्य पाएका खेलाडी नेयमारभन्दा एम्बाप्पे दोब्बर महंगा !

काठमाडौं। पछिल्लो समय फुटबलरहरुको कर्मा निकै ठूलो छ । अघिल्लो वर्ष सबैभन्दा धेरै कमाइ गर्ने खेलाडी बक्सर फेवेद मेवेदर थिए तर यस वर्ष सबैभन्दा धेरै कमाउने खेलाडीको सूचीमा शीर्ष ३ स्थान फुटबलरले कब्जा जमाएका छन् । शीर्ष ३ स्थानमा लियोनेस मेस्सी, क्रिस्टियानो रोनाल्डो र नेयमार छन् । यी तीन खेलाडीको व्यक्तिगत कमाइ धेरै भए पनि क्लवले उनीहरुको लागि तिर्ने मूल्यमा भने निकै गिरावट आएको छ । उत्कृष्ट प्रदर्शन गरिरहँदा पनि रोनाल्डोसँग अब खेल्ने समय १–२ वर्षभन्दा धेरै बाँकी छैन । रोनाल्डोभन्दा २ वर्ष कान्छा मेस्सीको पनि खेल्ने समय बढीमा ४ वर्ष मान्न सकिन्छ । अर्कोतर्फ लगातार घाइते भएर मैदानबाहिर रहने तथा कहिले बलात्कार, कहिले फ्यानमाथि आक्रमणजस्ता विभिन्न विवादमा परिरहेका कारण नेयमारको मूल्य पनि खस्किँदै गएको छ ।

फुटबल इतिहासमा अहिलेसम्म सबैभन्दा बढी मूल्यमा अनुबन्ध हुने खेलाडी नेयमार हुन् । २ वर्षअघि पेरिस सेन्ट जर्मेनले उनलाई बार्सिलोनाबाट लैजानको लागि २२० मिलियन गुरो तिरेको थियो । तर, अहिले उनको त्यो मूल्य छैन । उनको मूल्य लगातार घटिरहेको छ । तर, उनकै क्लवका अर्का युवा स्टारको मूल्यले भने आकाश छोएको छ । सिआइइएस फुटबल अब्जर्भेटरीले पिएसजीकै किलियन एम्बाप्पेलाई २५२ मिलियन युरो मूल्य निर्धारण गरेको छ । नेयमारको मूल्य भने १२५ मिलियन युरो तोकिएको छ । यसरी हेर्दा एम्बाप्पेको मूल्य नेयमारको मूल्यको दोब्बरभन्दा पनि बढी छ ।