युएईबाट वैधानिक रेमिट्यान्स गर्दा बर दुबईको फुलबारी रेस्टुरेन्टमा खाना सित्तैमा पाइने

युएई- युएईबाट वैधानिक तरिकाले रेमिट्यान्स गर्दा नेपालीहरुद्वारा संचालित फुलबारी रेस्टुरेन्टमा नेपाली खाना खान पाइने भएको छ । बर दुबईका स्तरीय नेपाली रेस्टुरेन्टमध्ये फुलबारी रेस्टुरेन्टमा मात्रै यो सुविधा पाइने रेस्टुरेन्टका संचालक ईश्वरप्रसाद उपाध्यायले बताउनुएभएको छ ।

युएईको लोकप्रिय लुलु एक्सचेञ्जबाट नेपालमा हिमालयन बैंकको हिमाल रेमिटमा पैसा पठाउदा यो सुविधा पाइने हिमाल रेमिटका युएई प्रतिनिधि रमिलराज प्रधानले जानकारी दिनुभएको छ । प्रधानका अनुसार यो कुपन बर दुबईको मिनाबजारमा रहेकोे लुलु एक्सचेञ्जबाट हिमाल रेमिटमार्फत नेपालमा पैसा पठाउँदा स्वत: पाइनेछ ।

यो अफर २०२० को १ जनवरीदेखि फेब्रुअरी १५ सम्म लुलु एक्सचेञ्जमा चल्नेछ । उक्त अवधिमा लुलु एक्सचेञ्जबाट नेपालमा रहेका आफन्तलाई हिमाल रेमिटमा पैसा पठाउँदा एक कुपन पाइनेछ र उक्त कुपन आगामी फेब्रुअरीभरि फुलबारी रेस्टुरेन्टमा स्वीकार गरिनेछ । फुलबारीका सन्चालक उपाध्यायका अनुसार उक्त कुपनको आधारमा मम, चाउमिन, नेपाली खाना सेट, थुक्पा वा सेल रोटीको सेट मध्ये एक आइटम सित्तैमा पाइनेछ ।
विश्वको विकसित सहरमा रहेको अन्तर्राष्ट्रिय स्तरको लुलु इन्टरनेसनल एक्सचेञ्जसँग सहकार्य गर्न पाउनु आफैंमा एउटा सुवर्ण अवसर भएको र आफ्नो रेस्टुरेन्टले यस अगाडि युएईको ख्यातिप्राप्त व्यावसायिक समुह अल रोस्ट्रमनी एक्सचेञ्जसँग पनि टाइअप गरी काम गरेकोले यसले व्यापार प्रवर्द्धनका साथै नेपाल, नेपाली संस्कृति झल्किने र नेपाल चिनाउने काम भएको संचालक उपाध्यायले दाबी गर्नुभएको छ । आफ्नो रेस्टुरेन्टलाई फुलबारी ब्रान्ड बनाउन चाहेको र युएईका प्रसिद्ध कम्पनीहरुसँगको सहकार्यले अझ ऊर्जा थपिएको संचालकले बताउनुभएको छ ।
हुण्डीले नेपालको अर्थतन्त्रमा नकारात्मक असर परिरहेको अवस्थामा यो कार्यले गर्दा नेपालमा धेरै भन्दा धेरै रेमिटेन्स भित्रिने र त्यसले नेपाल सरकारको अर्थतन्त्रमा वृद्धि हुने विस्वास पनि लिएको सञ्चालक उपाध्यायले बताउनुभएको छ ।

केही महिना अगाडि युएई सरकारको एक कार्यक्रममा छनौट भएर उत्कृष्ट रेस्टुरेन्टको उपाधी पाएको यो रेस्टुरेन्टले यस अगाडि पनि वैधानिक रेमिट्यान्स गर्दा नेपाली खाना सित्तैमा पाइने व्यवस्था गरेको थियो । उक्त योजनामा पनि करिब १ हजार जनालाई सित्तैमा खाना उपलब्ध गराएको संचालक उपाध्यायले बताउनुभयो ।

धादिङ स्थायी घर भएका ईश्वर उपाध्याय र लमजुङका हरिस गौलीको संयुक्त लगानीमा संचालित फुलबारी रेस्टुरेन्ट द इयर अफ टोलोरेन्स सेलिब्रेट दुबईमा फास्टफुड रेस्टुरेन्ट वर्गमा छनौट भएको संचालक ईश्वर उपाध्यायाले बताउनु भएको छ ।
फुलबारी रेस्टुरेन्टमा तयार हुने नेपाली परिकारले नेपाली संस्कृतिलाई प्रतिनिधित्व गर्दै उत्कृष्ट भएर छनौट भएको संचालक उपाध्यायले दाबी गरेका छन् । नेपाल र नेपालीहरुको प्रतिनिधित्व गर्दै दुबई पुलिसको उच्च निकायमा आफ्नो रेस्टुरेन्टका स्वादिष्ट नेपाली परिकार, नेपाली झन्डा र पोशाकमा सजिएर सहभागी भएको र उक्त प्रदर्सनीमा आफ्नो रेस्टुरेन्ट छनौट भएकोमा संचालक ईश्वर उपाध्यायले खुसी प्रकट गर्नुभएको छ ।

बरदुबईको नेपालीको सगरमाथा रेस्टुरेन्ट र फुलबारी रेस्टुरेन्टमा तयार पारिएका स्वादिष्ट नेपाली परिकार स्थानीय बासिन्दा र अन्य देशका सहभागीले मिठो मानी खाएर नेपाली खानाको इज्जत बढाएको सफल युवा व्यापारी ईश्वर उपाध्यायले बताउनुभयो ।