कुवेतमा एक महिलाको मृत्यु घर फर्काइदिन्छु भन्दै लाख लिएर एजेण्ट फरार

कुवेत, १८ जुलाई / रोजगारीको लागी कुवेत आएकी ४८ बर्षिया कल्पना भुजेलको मृत्यु भएको छ । शिवसतासी नगरपालिका – २ झापा स्थायी घर भएकी भुजेलको गत जुलाई १५ तारिक उपचारको क्रममा कुवेतको मुबारक अल कबिर अस्पतालमा मृत्यु भएको हो ।

नेपाली राजदूतावास कुवेतका अनुशार उनलाई स्वास्थ्यमा समस्या थियो । स्वास्थ्य स्थिति नाजुक हुँदै गएपछि उनी जाब्रिया स्थिति नेपाली दूतावासको सम्पर्कमा गएको थिईन । करिब तीन साता दूतावासको संरक्षणमा बसेकी कल्पनाको स्वास्थ्य स्थिति झन् गम्भीर हुँदै गएपछी अस्पताल पठाईएको नेपाली दूतावासले जनाएको छ । ‘उहाँ बिरामी भएर दूतावासमा आउनुभएको थियो । बीस दिनजति हाम्रै संरक्षणमा बसेपछी स्वास्थ्य झन् खराब भएर एम्बुलेन्स बोलाएर अस्पताल पठाईएको हो ।’ नेपाली दूतावासका सूचना अधिकारी प्रेमराज गौतमले भने । ‘अस्पतालले डेथ सर्टिफिकेट नदिई सकेकाले मृत्युको एकिन कारण खुलिसकेको छैन । तर, उहाँ हाम्रो सम्पर्कमा आउँदादेखि नै बिमारी हुनुहुन्थ्यो ।’ गौतमले बताए । ‘उहाँलाई मैले अस्पतालमै गएर भेटेको । ‘खानमन नलाग्ने, बान्ता हुने जस्ता लक्षण छ भन्नुहुन्थ्यो’ अस्पतालमै पुगेर मृतक कल्पनालाई भेटि कुराकानी गरेर फर्किएका झापाली समाज कुवेतका अध्यक्ष राजु धिमालले बताए ।

लाख लिएर एजेण्ट फरार

मृतक भुजेल नेपालबाट एजेण्टका रुपमा काम गर्ने भद्रपुर नगरपालिका – ४ राईटोल झापा स्थायी ठेगाना भएका धनिराम राई भन्ने ब्यक्तिको माध्यमबाट कुवेत आएको प्रारम्भिक जानकारी प्राप्त भएको छ । यसैबिच कल्पनाको मृत्यु हुनुभन्दा पहिले नेपाल फर्काईदिन्छु भन्दै एकलाख नेपाली पैसा लिएर कुवेत बस्दै आएका एकजना ब्यक्ति भने फरार भएका छन् । समाजका अध्यक्ष धिमालका अनुशार कल्पना बिरामी भएर काममा जान नसकेपछि उनले कुवेतमै रहेका दिपक अधिकारी भन्ने अर्का एक ब्यक्ति ( कुवेतको एजेण्ट ) लाई घर फर्काईदिन अनुरोध गरेकी थिईन । उनले एकलाख दिए घर पठाईदिने भनेपछी कल्पना ( मृतक )को नेपालका आफन्तले दिपक ( एजेण्ट ) को आफन्तको खाता मार्फत एक लाख दिएका थिए । निरेमलाई प्राप्त प्रमाण अनुशार इलाम स्थित नेपाल एसबिआई बैंक मार्फत अधिकारीको आफन्त मिरा रानामगरको खातामा सो पैसा हालिएको देखिन्छ । नेपालमा उक्त पैसा पाएपछी कुवेतको एजेण्ट भनिएका अधिकारी भने फरार थिए । फरार अधिकारीलाई कुवेत प्रहरीले पक्रेर नेपाल ‘डिपोर्ट’ गरिसकेको बुझिन्छ ।

४८ बर्षमा कुवेत
सामान्यतया मान्छेको चाहना हुन्छ कमाउन , पढ्न वा घुमफिर जे गर्न भएपनी उमेरमा एकचोटी बिदेश जाने ।तर, मृतक कल्पनाको सन्दर्भमा भने निकै रोचक तथ्य भेटिएको छ । हाम्रा स्रोतहरुबाट प्राप्त उनको नागरिकता अनुशार उनी जीन्दगीको आधाभन्दा धेरै उमेर गैसकेपछि करिब ४८ बर्षको उमेरमा कुवेत आएको तथ्य भेटिएको छ । उनी ५ महिनाअघि मात्रै कुवेत आएकी थिईन् ।नागरिकताको जन्म मिति अनुशार उनी ४७ पुगेर ४८ बर्ष लागेपछी कुवेत आएको पुष्टी हुन्छ । कुवेतमा पहिलो पटक नेपाली कामदार ल्याउँदा प्राय कम्पनीहरुले २१ देखी ३० बर्षसम्मका फ्रेस तथा युवाहरु खोज्दछ तर एजेण्टकै भर परे उनी जीन्दगीको प्रौढ कालमा बिदेश आएकी थिईन् ।

‘ईलिगल’ हुँदा शव पठाउँन गार्हो
प्राप्त सूचनाहरु अनुशार मृतक कल्पना भुजेल गैरकानुनी रुपमा कुवेत बस्दै आएको खुलेको छ । गैरकानुनी रुपमा भारतको हवाईमार्ग हुँदै कुवेत आएकी उनको ‘ईलिगल’ बसाई भएकाले मृत्युपछी कुवेत सरकारको नियमानुशार गर्नुपर्ने प्रकृया पुरा गर्नको लागी समस्या भएको छ । प्रकृया नपुर्याई शव नेपाल पठाउँन पाईदैन तर त्यो पूरा गर्न ईलिगल भएकाले बिभिन्न कठिनाईहरु हुन्छन् । जसले गर्दा मृतक भुजेलको शव मुबारक अस्पतालमै छ । शव नेपाल पठाउन आवश्यक प्रकृया सुरु गरिसकेको भने नेपाली दूतावास कुवेतले जनाएको छ ।

बढ्दो ठगी
कमाईका हिसाबले मध्यपूर्वको आर्कषक श्रम गन्तब्य मध्यको एक कुवेतमा ठगीका घटनाहरु बढ्न थालेका छन् । बिशेष गरेर घरेलु कामदारको रुपमा कुवेत आएका अशिक्षित महिला र गैरकानुनी( ईलिगल ) रुपमा बसिरहेका महिलाहरु ठगको निशानामा पर्ने गरेका छन् । एजेण्टका रुपमा काम गर्ने बिचौलियाहरुले नेपालको एयरपोर्ट नभइ भारत लगायत अन्य देशको बाटो हुँदै महिलाहरुलाई कुवेत तथा अरबको अन्य देशहरुमा पठाउँने गरेका छन् ।
बैधानिक रुममा घरेलु कामदारको रुपमा कुवेत आउन पाईदैन । सरकारले बैधानिक बाटो बन्द गरिदिएपछी बिभिन्न अन्य अबैधानिक र गैरकानुनी तरिकाले कुवेत आउँने महिलाहरुको संख्या बढ्दो छ । जसले गर्दा ठगीका साथै अकाल मृत्युका घटनाहरु दिनदिनै बढिरहेका छन् ।