दशैं मनाउन काठमाडौं उपत्यकाबाट २१ लाख यात्रु गन्तव्य तर्फ लागे

काठमाडौं, ३१ असोज । काठमाडौं उपत्यकाबाट दशैं मनाउन २१ लाखभन्दा बढी यात्रु बाहिरिएका छन् । महानगरीय ट्राफिक महाशाखाका अनुसार विगत चार दिनको अवधिमा यति संख्यामा यात्रु बाहिरिएका हुन् ।

स्थलमार्गबाट मात्रै २२ लाख यात्रु बाहिरिएको महाशाखाले अनुमान गरेको हो । टाढाटाढाका यात्रु बाहिरिए पनि काठमाडौँ आसपासका सिन्धुपाल्चोक, काभ्रे, नुवाकोट, धादिङलगायत जिल्लाका सर्वसाधारण आज पनि काठमाडौंबाट बाहिरिँदै गरेको महाशाखाका वरिष्ठ प्रहरी उपरीक्षक वसन्त पन्तले जानकारी दिनुभयो ।

दशैंभर काठमाडौँबाट करीब २४ लाख मानिस बाहिरिने ट्राफिक प्रहरीको आकलन छ । काठमाडौंबाट धेरै मानिस बाहिरिएसँगै दुई दिनदेखि काठमाडौँको चहलपहल घटेको छ भने सार्वजनिक यातायातका साधनसमेत कम चल्न थालेका छन् । काठमाडौंका प्रायः सडक र बजार सुनसान छन् ।