छेउको सिटमा मोटो मान्छे परेपछि एयरलाइन्सविरुद्ध केस, १५ लाख मुआब्जा माग

एजेन्सी। बेलायतका एक व्यक्तिले ब्रिटिस एयरवेज कम्पनीविरुद्ध अदालतमा मुद्दा हालेका छन् । वेल्सका स्टिभन प्रोसरले एयरलाइन्सको एक फ्लाइटमा आफ्नो छेउमा मोटो व्यक्ति पर्दा आफूलाई चोट लागेको भन्दै एयरवेजसँग क्षतिपूर्ति मागेका हुन् । प्रोसरले क्षतिपूर्तिस्वरुप कम्पनीसँग १० हजार पाउण्ड (झण्डै १५ लाख नेपाली रुपैयाँ) माग गरेका छन् ।

घटना २०१६ मा भएको हो । स्टिभन ब्रिटिस एयरवेजको फ्लाइटमा बैंककबाट लण्डन जाँदै थिए । उनी झ्यालतिरको सिटमा बसेका थिए । उनको छेउको सिटमा अग्लो कदका मोटा व्यक्ति बसेका थिए जो आफ्नो सिटमा ठिकसँग अटाउन सकिरहेका थिएनन् । स्टिभनका अनुसार ती व्यक्तिको तौल करिब १४० किलो र उचाइ झण्डै साढे ६ फिट जति थियो यही कारण ती व्यक्तिको शरीरको धेरै भाग स्टिभनको सिटमा आएको थियो ।

स्टिभनका अनुसार उनले विमानका स्टाफसँग सिट बदल्न भनेका थिए तर विमानका सबै सिट भरिएका थिए जसका कारण स्टाफले सिट बदल्न मानेनन् । त्यसपछि उनले १२ घण्टा ४० मिनेट ती मोटा व्यक्तिसँग बिताउनुपर्यो । स्टिभनले अदालतमा आरोप लगाएका छन् कि थोरै ठाउँमा दबिएर बस्दा उनकोमेरुदण्डको जोर्नीमा चोट लाग्यो जसका कारण ३ महिनासम्म उनको काम प्रभावित रह्यो ।

एयरलाइन्सले भने स्टिभनको दावीलाई अस्वीकार गर्दै फ्लाइटबाट निस्कने बेला उनलाई मेरुदण्डसँग सम्बन्धित कुनै समस्या नदेखिएको दावी गरेको छ । स्टिभनले अहिले आएर यो घटनामा आफूलाई क्षति भएको भन्दै वेल्सको अदालतमा मुद्दा दायर गरेका छन् । ब्रिटिश एयरवेजका वकिल ज्याक हार्डिङले भने स्टिभनले घटनालाई बढाइचढाइ गरेर पेश गरेको आरोप लगाएका छन् ।