Saturday 30th August 2025

मन्त्री विष्टले आफैँले प्रतिबन्ध लगाएको मलेशियामा पुरानै प्रक्रियाद्वारा पठाए कामदार

7 years अगाडी

काठमाडौं। गत जेठ २ गते श्रम, रोजगार तथा सामाजिक सुरक्षा मन्त्री गोकर्ण विष्टकै निर्देशनमा बन्द भएको मलेशिया रोजगारी ८ महिना पछि मन्त्री विष्टकै निर्देशनमा पुरानै प्रकृयामार्फत सुचारु भएपछि विवादास्पद बनेको छ। कारवाहीको प्रकृयामा रहेको भेन्डर कम्पनीमार्फत नै २० जना कामदार पठाएर मन्त्री विष्ट चुपचाप बसेपछि यस विषयमा झनै विवाद चुलिएको हो। यसअघि श्रमिकहरु भिएलएन, बायोमेट्रिक, जिएसजी र माइग्राम्सलगायतले कामदारमाथि आर्थिक शोषण गर्दै आएका संस्था खारेज गरी नेपाली श्रमिकको हकहितकोे लागि तोप बन्न तयार रहेको बताउँदै आएका मन्त्री विष्टले आफ्नो अडान कायम गरी श्रमिकलाई नयाँ श्रम समझदारी अनुसार पठाउन नसक्दा फेरि चुकेका छन्।

पछिल्लो समय आफूले खारेज गर्ने प्रकृयामा रहेका ती भेन्डर संस्था ब्युताउँन बाह्य गिरोहको चलखेल भएको बताउने विष्टले आँफै भेन्डर कम्पनी भिएलएनमार्फत कामदार पठाएर भिएलएनलाई ब्यूँताएको आरोप सहित आलोचना खेपिरहेका छन्।

मलेशिया रोजगारी बन्द भएको ५ महिनापछि गत कातिक १२ गते मलेशिया र नेपालबीच नयाँ प्रकृया अनुसार कामदार पठाउने गरी श्रम समझदारी पत्रमा हस्ताक्षर भइसकेको छ। तर श्रम मन्त्री विष्टले श्रम विभागलाई दिएको निर्देशन अनुसार गत आइतबारसम्म २३ जना श्रमिक विवादास्पद भेन्डर कम्पनी भिएलएनमार्फत नै पठाएपछि मलेशिया रोजगारी झनै विवादास्पद बनेको हो।

श्रम कार्यालय ताहाचलका कार्यालय प्रमुख देवेन्द्र कार्कीले डिसिनेपालसँग भने, ‘मन्त्री विष्टको निर्देशनमा हामीले गत आइतबारसम्म २३ जना श्रमिकहरुलाई श्रम स्वीकृति दिइसकेका छौँ।’ प्रमुख कार्की भन्छन्, ‘ती २३ जना श्रमिकहरुले व्यक्तिगत प्रकृयामार्फत श्रम स्वीकृति लिएकाले मन्त्रालयको निर्देशन हामीले पठाएका हौँ। उनीहरुले नेपालस्थित मलेशियन दूतावासमार्फत प्रकृया पुर्याएर सोझै भिसा पाएका हुन्।’

कार्यालय प्रमुख कार्कीले वैदेशिक रोजगार ऐन तथा नियमावली अनुसार प्रकृया पुर्याएका र मलेशियन दूतावासमार्फत भिसा पाएका र मन्त्रालयमार्फत निर्देशन आएका २३ जना श्रमिकहरुलाई मलेशिया जानका लागि अन्तिम श्रम स्वीकृति दिएको बताए।

मन्त्री विष्टको निर्देशनमा हामीले गत आइतबारसम्म २३ जना श्रमिकहरुलाई श्रम स्वीकृति दिइसकेका छौँ उनले थप अरु श्रमिकलाई भने मलेशियाका लागि अन्तिम श्रम स्वीकृति दिन निर्देशन मन्त्रालयबाट नआएकोले २३ जना श्रमिकमात्र मलेशिया रोजगारीका लागि पठाएको जानकारी दिए।

के भन्छन् व्यवसायी ? : वैदेशिक रोजगारीमा जाने नेपाली श्रमिकको गन्तव्य मुलुकका रुपमा रहेको मलेशियामा कामदार पठाउन बन्द भएपछि आफ्नो म्यानपावर व्यवसाय नै धरापमा रहेको बताउँदै आएका व्यवसायी मलेशियासँग नेपाल सरकारले गत कातिक १२ गते एमओयुमा हस्ताक्षर गरेपछि कामदार पठाउन पाउनेमा ढुक्क थिए।

श्रम समझदारी पत्रमा हस्ताक्षर भएसँगै मलेशिया सरकारले कलिङ भिसा लागेका कामदारलाई पुरानै प्रकृयाबाट पठाउन पत्राचार गरेपछि व्यवसायी पनि कलिङ भिसा लागेका ९ हजार बढी कामदार पुरानै प्रकृयामा पठाउन सरकारसँग आग्रह गरीरहेका थिए। आफ्नै अडान लिएको सरकारले यसरी बीचैमा अडान छोडेर पुरानै अस्तित्वहीन भिएलएन कम्पनीमार्फत कामदार पठाएपछि व्यवसायी सरकारसँग आक्रोश भएका छन्।

वैदेशिक रोजगार व्यवसायी संघका अध्यक्ष रोहन गुरुङले भने, ‘हामीले सरकारले ८ महिनापछि नयाँ प्रकृयाबाट नेपाली श्रमिकलाई पठाउन पहल गर्छ र सहज तरिकाबाट नेपाली श्रमिक मलेशिया जान पाउँछन् भन्ने जुन अपेक्षा लिएका थियौँ तर ८ महिनापछि पनि सरकार पुरानै प्रकृयामा आएर अड्कियो।’

अध्यक्ष गुरुङले अस्तित्वहीन भिएलएनमार्फत नै कामदार पठाएकोले सरकारले मलेशिया रोजगारीमा अपारदर्शी ढंगबाट काम गरिरहेको आरोप लगाए। भिएलएनमार्फत केही कामदार मात्रै मलेशिया रोजगारीको लागि पठाएपछि म्यानपावर कम्पनीमार्फत पनि कामदार पठाउन सकिने आसमा बसेका म्यानपावर व्यवसायीको आश फेरि निराशामा परिणत भएको छ। सरकारले म्यानपावर कम्पनीमार्फत श्रमस्वीकृति लिएका कामदार पनि मलेशियन दूतावासमार्फत भिसा पाएपछि मात्र मलेशिया जान पाउने बताएको छ।

सरकारले म्यानपावर कम्पनीलाई मलेशियाको कलिङ भिसा लागेका श्रमिकको नाम, ठेगाना, ईमेल, फोन नं सहित डिटेल माग गरेको छ। यस अघि पनि सरकारले पटक पटक श्रमिकहरुको विवरण माग गरेको तर कामदार पठाउने कुनै प्रकृया नअपनाएकोले व्यवसायीहरुले यो पटक विवरण उपलब्ध नगराउने बरु कलिङ भिसा लागेका ९ हजार ३ सय ३४ कामदारहरुलाई म्यानपावर कम्पनी मार्फत तत्काल मलेशिया रोजगारीमा पठाउनुपर्ने माग गरेका छन्। व्यवसायी मलेशिया रोजगारी बन्द भएसँगै व्यवसाय धरापमा परेको भन्दै कामदार म्यानपावर कम्पनीमार्फत नै पठाउन आग्रह गर्दै नेता देखि प्रधानमन्त्रीसम्म भेटघाट गर्दै आइरहेका छन्।

संघीय संसदको बैठकमा मन्त्री विष्टको आलोचना : बिहीबार संघीय संसदको उद्योग वाणिज्य र श्रम तथा उपभोक्ता हित समितिको बैठकमा समेत आफैँले प्रतिबन्ध लगाएको प्रतिबन्धित मलेशियामा श्रमिक पुरानै प्रकृयामा पठाएको भन्दै मन्त्री विष्टको आलोचना भएको छ। झण्डै १० हजार कलिङभिसा लागेका कामदार हुँदाहुँदै कलिङ भिसा लागेकै २० जनालाई मात्रै पठाउनु मन्त्री विष्टको विभेदपूर्ण निर्णय भएको समितिका सदस्यहरुले आरोप लगाए।

बैठकमा उपस्थित संसदले २० जना कामदारलाई मात्र मलेशिया पठाउनु र बाँकी झण्डै १० हजार कामदारलाई मलेशिया जान नदिनुमा ठूलै आर्थिक चलखेल भएको हुनसक्ने आशंका गरेका थिए।

मलेशियन सरकारको पुरानै अडान : शून्य लागतमा कामदार पठाउन मलेशिया र नेपाल सरकारबीच गत कात्तिक १२ गते श्रम समझदारी पत्र एमओयुमा हस्ताक्षर भएको थियो। समझदारी पत्रमा हस्ताक्षर भएपछि पनि मलेशियन सरकारले नेपाली कामदार पुरानै संरचनाको प्रयोग गर्न निष्कर्ष सुनाएको छ। गत सोमबार मलेशियन दूतावासले पुरानै प्रकृयामार्फत कामदार पठाउन परराष्ट्र मन्त्रालयलाई पत्राचार गरेको थियो।

उक्त पत्रमा दूतावासले कामदार पुरानै प्रकृयामा लैजाने अडान राखेको छ। अध्यागमन, सूरक्षा जाँच, स्वास्थ्य परीक्षण, र बायो मेडिकल प्रकृया उही रहने उल्लेख गरेको छ। पत्रमा उल्लेख छ, मलेशिया सरकारले स्वीकृति दिएका ३७ स्वास्थ्य परीक्षण संस्थाबाट स्वास्थ्य परीक्षण गराएर उल्लेखित सबै संयन्त्रमार्फत नै सम्पूर्ण प्रकृया पूरा गरेका कामदारलाई मात्रै मलेशियाको अध्यागमनले अनुमति दिनेछ।

मलेशियन सरकारले कामदार पठाउन पुरानै संयन्त्र व्यूँताउने उल्लेख गरी पत्राचार गरेको छ। अबैध भन्दै सरकारले खारेजीको प्रकृयामा पुर्याएकै भिएलएन, वान स्टेप सेन्टरमार्फत नै कामदार लैजाने मलेशिया सरकारले पनि उल्लेख गरेको छ।

किन चुपचाप मन्त्री विष्ट ? : मलेशिया रोजगारी बन्द गरेर गैह्रकानुनी संयन्त्रमार्फत कामदार नपठाउने अडान लिएका श्रम,रोजगार तथा सामाजिक सुरक्षा मन्त्री गोकर्ण विष्ट भने २३ जना कामदारहरु पुरानै संयन्त्र मार्फत पठाएर चुपचाप छन्।

मन्त्री विष्टले पछिल्लो समय कामदार पठाएपछि कुनै औपचारिक प्रतिकृया भने दिएका छैनन्। मन्त्रालयको स्रोतले मन्त्री विष्टले दूतावासको पत्रलाई अध्ययन गरिरहेको र छिट्टै निश्कर्षमा पुग्ने जानकारी दिएको छ। केही विश्लेषकहरुले भने मलेशिया रोजगारीमा अडान राख्दै आएका मन्त्री गोकर्ण विष्टले पुरानै प्रकृया मार्फत कामदार पठाएपछि मन्त्री विष्ट अडानबाट डगमगाएको बताएका छन्।

          January 25, 2019 12:20 pm | टप


प्रतिकृयाहरू :

समाचारहरु:

भर्खरै प्रकाशित


Loading...