च्याम्पियन्स लिग प्रिभ्युः घरेलु मैदानमा बोरुसिया डोर्टमण्डलाई पराजित गर्ने दाउमा टोटनहम

काठमाडौँ, १ फागुन । आज राति च्याम्पियन्स लिगको अन्तिम १६ को खेलमा टोटनहम र बोरुसिया डोर्टमण्ड आमने सामने गर्दैछन् । यस सिजन दुवै टोली उच्च फर्ममा रहेका छन् ।

प्रिमियर लिग उपाधि होडमा टोटनहम रहेको छ भने बुण्डेसा लिगमा बोरुसिया शिर्ष स्थानमा रहेको छ । यस सिजन दुवै टोली उपाधि जित्ने दाउमा रहेका छन् ।

टोटनहमको घरेलु मैदानमा हुने खेलमा बोरुसियालाई रोक्न कठिन हुने समिक्षकहरुले बताएका छन् । टोटनहमभन्दा पनि बोरुसियाको खेल उत्कृष्ट रहेको र हरेक पक्ष सवल रहेको उनीहरुको भनाइ छ ।

यी दुई टोलीबीच गएको चार वर्षमा चार पटक नै खेल भएको छ । दुई पटक बोरुसियाले र दुई पटक टोटनहमले खेल जितेका छन् । बोरुसियाले टोटनहमविरुद्ध प्रत्येक खेलमा गोल गरेको छ । बोरुसियाले अन्तिम ६ च्याम्पियन्स लिगमध्ये पाँचपटक च्याम्पियन्स लिगको यात्रा तय गरेको छ ।

टोटनहमको च्याम्पियन्स लिग यात्रा भने खासै सुखद रहेको छैन । यस सिजन टोटनहम नेगेटिभ गोल भिन्नताका आधारमा च्याम्पियन्स लिगको अन्तिम १६ मा स्थान बनाउन सफल भएको हो ।