परीक्षा सुरु हुनु अघि नै बाहिरियो सामजिक विषयको प्रश्नपत्र

धनुषा – माध्यमिक शिक्षा परीक्षा (एसईई)को सामाजिक विषयकाे प्रश्नपत्र पनि परीक्षा सुरु हुनु अघि नै बाहिरिएकाे छ । सप्तरी र धनुषामा अनिवार्य सामाजिक अध्ययन विषयकाे प्रश्नपत्र पनि बाहिरिएको आशंका गरिएको छ ।

विज्ञान विषयको प्रश्न पत्र बाहिरिएपछि बिहीबार प्रदेश २ मा साे विषयकाे परीक्षा नै रद्द गरिएकाे छ । विज्ञान विषयकाे परीक्षा हुनुभन्दा एक दिनअगावै प्रश्‍नपत्र बाहिरिएकाे थियाे ।

सामाजिक विषयकाे प्रश्नपत्र भने जनकपुरबाट बाहिरिएको हुन सक्ने र सप्तरीसम्म पुगेकाे आकलन गरिएकाे छ । सामजिक सञ्जालमार्फत प्रश्नपत्र फैलिएकाे बताइन्छ ।

आज शुक्रबार हुने परीक्षाको प्रश्‍नपत्र जनकपुरमा बिहीबार नै फेला परेको छ । सामाजिक सञ्जालमार्फत देखिएका प्रश्‍नपत्र आधिकारिक हाे वा हाेइन भन्ने खुलेकाे छैन, आज परीक्षा सुरु भएपछि यसकाे पुष्टि हुन सक्नेछ ।

राष्ट्रिय परीक्षा बोर्ड बैठकले प्रश्‍नपत्र बाहिरिएको विषयमा अध्ययन अनुसन्धानका लागि १५ दिने म्यादसहित छानबिन समिति गठन गरेकै दिन बिहीबार सामाजिक अध्ययनको प्रश्‍नपत्र पनि परीक्षाअगावै सामाजिक सञ्जालहरुमा देखा परेको हो । यद्यपि यसकाे पुष्टि हुन बाँकी छ ।

विज्ञान विषयको प्रश्नपत्रसँग समूह र नम्बरसहित लेखिएको हुबहु मिल्दा चिटहरु परीक्षाकाे एकदिनअगावैदेखि सप्तरी र सिरहालगायत जिल्लामा देखिएका थिए, अन्तत: प्रश्नपत्र बाहिरिएकाे पुष्टि भएपछि साे परीक्षा बिहीबार नै रद्द गरियाे ।