नेपाली क्रिकेट टिमका नवनियुक्त प्रशिक्षक पटवाललाई टमाटाकाे स्वागत !

काठमाण्डाै – नेपाली क्रिकेट टिमका प्रशिक्षक जगत टमाटाले नविनयुक्त प्रशिक्षक उमेश पटवाललाई स्वागत गरेका छन् । एक वर्षका लागि विदेशी प्रशिक्षकको रुपमा आईसीसीले पटवाललाई नेपाल पठाएपछि यसअघि टिम सम्हाल्दै आएका प्रशिक्षक टमाटा स्वागत कार्यक्रममा देखिएका थिएनन् ।

तर उनले सामाजिक सञ्जाल फेसबुकमार्फत भारतीय मूलका प्रशिक्षक पटवाललाई स्वागत गर्दै नेपाली क्रिकेटको विकासमा सधैँ साथ रहने प्रष्ट पारेका छन् । टमाटाले आफूले नेपाली टिम सम्हाल्दा सहयोग गर्ने सबैलाई धन्यवाद समेत दिएका छन् ।

शुक्रबार काठमाण्डौमा भएको कार्यक्रममा नेपाली टिमका कप्तान पारस खड्का र टिम म्यानेजर रमन शिवाकोटीले पटवाललाई स्वागत गरेका थिए । त्यस अवसरमा खेलाडीहरुले नै नेपालले एक दिवसीय मान्यता पाएपछि विदेशी प्रशिक्षक चाहियो भनेर आईसीसीलाई भनेकाले त्यसैअनुसार नेपाल बुझेका पटवाललाई पठाएको हुन सक्ने कप्तान खड्काले बताएका थिए

यसअघि प्रशिक्षकाे जिम्मेवारी सम्हाल्दै आएका टमाटाको भूमिका के हुने भन्दै पत्रकारले राखेको जिज्ञाषामा कप्तान खड्काले हामी व्यक्तिमा केन्द्रित हुनुभन्दा पनि क्रिकेटको भलाईका बारेमा सोच्नु पर्ने जवाफ दिएका थिए ।