१२ गतेदेखि कतारमा रहेको नेपाली दूतावासबाट पुनः श्रम स्वीकृति सेवा पाइने

काठमाण्डौ – कतारमा रहेको नेपाली दूतावासले आउँदो मङ्गलवार अर्थात् वैशाख १२ गतेदेखि पुनः श्रम स्वीकृति सेवा प्रदान गर्ने भएको छ ।

सरकारले विदेशमा रहेका नेपाली नियोगबाट पनि श्रम स्वीकृति सेवा प्रदान गर्ने निर्णय गरेसँगै १२ गतेदेखि सेवा प्रदान गर्ने दूतावासले जनाएको छ । दूतावासले दैनिक ५० वटासम्म श्रम स्वीकृतिको टोकन खुलाउने जनाएको छ ।

पुनः श्रम स्वीकृति लिनका लागि अनलाइनबाटै आवेदन दिन पर्छ । आवेदन दिँदा राहदानी, कतारी आइडी कार्ड, करार सम्झौता पत्र, पुरानो श्रम स्वीकृति, कतार गएको मिति प्रस्ट देखिने कागजात अपलोड गर्नुपर्छ ।

अनलाइनबाट आवेदन दिनका लागि https://feims.dofe.gov.np/ मा गई वैदेशिक रोजगारीमा गएका वा जान चाहने व्यक्तिका लागि मात्र लेखिएको ठाउँमा क्लिक गर्न पर्छ । त्यसपछि लगअनमा क्लिक गर्नुपर्छ ।

फेमिस सिस्टममा पहिले नै आवद्ध भएर पासवर्ड बिर्सिएको भएमा नयाँ पासवर्डका लागि दूतावासमा सम्पर्क गर्नुपर्छ । अनलाइनबाट सबै प्रक्रिया अघि बढाएर अन्तिममा गएपछि श्रम स्वीकृति दिने ठाउँमा भने दोहा कतार भनेर छनौट गर्न पर्छ ।

श्रम स्वीकृति लिनका लागि कल्याणकारी कोषमा, जीवन बिमा र सामाजिक सुरक्षा कोषमा रकम बुझाउन पर्ने हुन्छ  । कनेक्ट आइपिएस, इसेवा र खल्ती लगायत एपबाट यस्तो रकम तिर्न सकिन्छ । उज्यालो