केही करसम्बन्धी सेवाहरू पालिकाबाट शुरु गर्ने अर्थ मन्त्रालयको तयारी

काठमाण्डौ – केही करसम्बन्धी सेवाहरू पालिकाबाट शुरु गर्ने अर्थ मन्त्रालयको तयारी रहेको छ । अर्थमन्त्री रामेश्वर खनालले करदाता सेवा कार्यालयबाट प्रदान भएका केही करसम्बन्धी सेवाहरू पालिकाबाट शुरु गर्ने बताउनुभएको छ ।

अन्तरसरकारी वित्त परिषद्को ११औँ बैठकलाई सम्बोधन गर्दै परिषद्का संयोजकसमेत रहेका अर्थमन्त्री खनालले करदाता सेवा कार्यालयबाट प्रदान भएका केही करसम्बन्धी सेवाहरू पालिकाबाट शुरु गर्ने प्रबन्ध मिलाइएको जानकारी दिनुभएको हो । करदाताले स्थानीयस्तरमै सेवा प्राप्त गर्ने र पालिकाको राजस्व क्षमतासमेत अभिवृद्धि हुने उहाँले जानकारी गराउनुभयो ।

अर्थमन्त्री खनालले बजेट निर्माण र कार्यान्वयनमा प्रदेश र पालिका स्वतन्त्र, स्वयम् उत्तरदायी भएको धारणा व्यक्त गर्नुभयो । कार्यक्रममा सातै प्रदेशका अर्थमन्त्रीले संयुक्त रूपमा तयार गरेको वित्तीय सङ्घीयता सम्बद्ध घोषणापत्र कार्यान्वयन सहजीकरणका लागि सङ्घीय अर्थमन्त्रीसमक्ष पेश गरेका थिए ।

नगरपालिका सङ्घ र गाउँपालिका महासङ्घका अध्यक्षसहित विभिन्न पालिकाका प्रतिनिधि सदस्यले वित्तीय समानीकरण अनुदान विनियोजनबमोजिम प्राप्त हुनुपर्ने, वित्तीय सङ्घीयता कार्यान्वयनसँग सम्बन्धित कानूनी तथा प्रक्रियागत विषयहरूमा छिट्टै टुङ्गोमा पुग्नुपर्नेमा जोड दिएका थिए । उज्यालो