क्यान्सर पीडित प्रेम कुमारी लिम्बुलाई झापाली समाज कुवैतको आर्थिक

क्यान्सर रोगबाट पीडित हल्दिबारी गाउँपालिका वडा नं. ४ निवासी प्रेम कुमारी लिम्बुको उपचार सहयोगार्थ विभिन्न व्यक्ति तथा संस्थाको पहलमा आर्थिक सहयोग हस्तान्तरण कार्यक्रम सम्पन्न भएको छ।

वि.पि. कोइराला मेमोरियल क्यान्सर अस्पताल, भरतपुरमा उपचाररत लिम्बुको परिवारको आर्थिक अवस्था कमजोर भएकाले उपचारलाई निरन्तरता दिन समस्या भएको भन्दै हल्दिबारी गाउँपालिका वडा कार्यालयले सिफारिस पत्रमार्फत सहयोगको अपिल गरेको थियो।

उक्त सहयोग कार्यक्रमको सञ्चालन स्थानीय समाजसेवी युवा अनिल चौहानले गरेका थिए। कार्यक्रममा झापाली समाज कुवैतका प्रतिनिधिहरू सन्तकुमार अधिकारी, धर्मनन्द अधिकारी, छविमाया पौडेल, समाजका कोषाध्यक्ष गोविन्द कार्की तथा स–कोषाध्यक्ष मनिष भट्टराईको उपस्थिति रहेको थियो।

उनीहरूलाई हल्दिबारी गाउँपालिका कार्यालयमा गाउँपालिका अध्यक्ष रविन्द्र लिङ्देन, उपाध्यक्ष लक्ष्मी देवी मैनाली तथा वडा नं. ४ का अध्यक्ष सन्त कुमार थापाले स्वागत गर्दै पालिका भ्रमणसमेत गराएका थिए। कार्यक्रममा स्थानीय सञ्चारकर्मी देबिका अधिकारीको पनि भौतिक उपस्थिति रहेको थियो।

सो अवसरमा झापाली समाज कुवैतले क्यान्सर पीडित लिम्बुको उपचारका लागि रु. ३०,००० (तीस हजार रुपैयाँ) आर्थिक सहयोग प्रदान गरेको जनाइएको छ। सहयोग रकमले उपचारमा केही राहत पुग्ने अपेक्षा गरिएको छ।

स्थानीय जनप्रतिनिधि तथा सरोकारवालाहरूले यस्ता सामाजिक कार्यले पीडित परिवारलाई हौसला मिल्ने विश्वास व्यक्त गरेका छन्।