अर्थ मन्त्रालयद्वारा बजेट मार्गदर्शन तयार

काठमाण्डाै – आउँदो आर्थिक वर्ष २०८३/८४ का लागि अर्थ मन्त्रालयले बजेट मार्गदर्शन तयार पारेको छ । सरकारले हरेक वर्ष जेठ १५ गते संसदमा बजेट पेश गर्नुपर्ने संवैधानिक दायित्व छ । त्यसैअनुसार अर्थ मन्त्रालयले बजेट मार्गदर्शन तयार पारेको हो ।

बजेट मार्गदर्शन तयार पारेर सबै मन्त्रालयलाई पठाइसकेको मन्त्रालयका सहसचिव टंकप्रसाद पाण्डेयले बताउनुभयो । उहाँकाअनुसार आउँदो बजेट आर्थिक अनुशासन र खर्चमा मितव्ययीतालाई उच्च प्राथमिकता राखेर लेखन तयारी भइरहेको छ ।

साथै सम्बन्धित सबै मन्त्रालयलाई  संवेदनशील हुन र आयोजनाको बजेट प्रस्ताव गर्दा तयारी पूरा भएका आयोजना, तत्काल ठेक्का पट्टामा जान सकिने आयोजना र याेजना बैंकमा सूचीकृत भइसकेका आयोजनालाई मात्र राख्ने गरी मार्गदर्शन पठाएको सहसचिव पाण्डेयले बताउनुभयो ।

मन्त्रालयलकाअनुसार योजना आयोगका उपाध्यक्ष नेतृत्वको स्रोत अनुमान समितिले बजेट सिलिङ पठाइसकेको छ । गएको वर्षको तुलनामा यो वर्ष कम सिलिङ प्रस्ताव गरिएको  छ । नयाँ सरकारको प्राथमिकता तथा राष्ट्रिय स्वतन्त्र पार्टीको वाचापत्रलाई समेत आउँदो बजेटले सम्बोधन गर्ने मन्त्रालयले जनाएकाे छ । उज्यालो