सत्तापक्ष र प्रतिपक्षको अलोकतान्त्रिक प्रवृत्ति उजागर भयो : नेता शर्मा

काठमाडौं, १९ साउन । नयाँ शक्ति पार्टी, नेपालका नेता कृष्ण शर्माले प्रधानन्याधीशको संसदीय सुनुवाई प्रकरणबाट सत्तापक्ष र प्रतिपक्ष दुवैको अलोकतान्त्रिक चरित्र उजागर भएको बताएका छन् ।‘संसदीय सुनुवाइ समितिको बहुमतबाट प्रस्तावित प्रधानन्यायाधीश दीपककुमार जोशीको नाम अस्वीकृत भएको छ,’ शर्मा भन्छन्, ‘विगतका फैसला, शैक्षिक योग्यता, इमानदारीता, नैतिकता र आचरणमा सार्वजनिकरूपमा प्रश्न उठ्ने जोकोहीलाई प्रधानन्यायाधीशमा नियुक्ति गर्नु न्यायसंगत एवं औचित्यपूर्ण हुनसक्दैन ।’

नेता शर्माले प्रधानन्यायधीश जस्तो गरिमामय पदमा सत्तापक्ष र प्रतिपक्षले समर्थन र विरोध गर्दै गणितीयरूपमा दुईतीर बाँढिनु दुःखद भएको बताए । ‘यसरी समर्थन र विरोधमा गणितीयरुपमा बाँढिएर अदालत र न्यायाधीशलाई आ-आफ्नो राजनीतिक स्वार्थ, खिचातानी र दाउपेचको थलो बनाउन खोज्नु आपत्तिजनक छ,’ उनले भने । यो प्रकरणले दुवै पक्षको अलोकतान्त्रकि चरित्र उजागर भएको उनको जिकिर छ । ‘यस प्रकरणले सत्तापक्ष र प्रतिपक्ष दुइटैको अलोकतान्त्रिक प्रवृत्तिलाई उजागर गरिदिएको छ,’ नेता शर्मा भन्छन्, ‘संसदीय शक्तिबाट विधिको शासन, निष्पक्ष र स्वतन्त्र न्यायपालिकाको मान्यतालाई फगत दलीय राजनीतिक स्वार्थ भजाउने औजार मात्र बनाईएको कुरा पुष्टि भएको छ ।’