दम, खोकी र श्वासप्रश्वास रोगीका लागि अमृतसमान छ असुरो

काठमाडौं । विभिन्न जडीबुटीमध्ये सर्वसुलभ रूपमा पाइने जडीबुटी हो असुरो। वन औषधिको नामले पनि असुरोलाई चिनिन्छ। एकपटक उम्रिसकेपछि प्राय नाश नहुने असुरो खेत वारी एवं काल्लाहरूमा पनि प्रशस्तै पाइन्छ। गाँठागाँठा परेको डाँठ र भालाकार वा अण्डाकारको हरियो पात हुने यो वृक्षको फूल सेतो सिंहको मुखजस्तो देखिन्छ । यसको पात, जरा र फूलमा पाइने पदार्थले श्वासप्रश्वास प्रणालीका समस्यालाई सुधार गर्छ।

असुरोले श्वासमार्गमा जमेर रहेको कफलाई सजिलै बाहिर निकाल्छ । असुराको पातलाई सुकाएर चिलिममा राखेर तमाखुजसरी खाने वा ताजा पातको रस निचोरेर मह वा अदुवाको रससँग खाँदा पुरानो खोकी र दम पनि निको हुन्छ। असुरोलाई आउँमासी परेको बेलामा मिश्रीसँग मिलाएर खाँदा फाइदा गर्छ।

त्यस्तै, धेरै दिनदेखि आएको ज्वरोमा चिराइतो, कुट्की र पिपलासँग मिलाएर यसको प्रयोग गर्न सकिन्छ। पात वा फूलको रस १० मिली र सुपको रूपमा ४० देखि ८० मिलि प्रयोग गर्न सकिन्छ। असुरो प्रयोग गर्दा रोगीको क्षमता र मात्राको संयोजन नमिलेमा हानिकारक पनि हुन सक्छ।